شخبطة

شخبطة..

الحياة ملخبطة .. والرؤية مشبرة .. والخطوة معفرة..

ساعات ببقي شايف .. مع ان عيوني مغمضة .. وساعات ببقي تايه .. وانا في عز الصحصحة..

 اوقات باحس اني لازم ابطل فرهدة .. واشغل وقتي في حاجة مزقططة .. انجح فيها و تعلمني الرضا..

 كتير باحس الناس متسلطة .. ومابتعملش حاجة من غير شعبطة .. ابص في وشوشهم الاقي مصلحة .. ودايما حواجبهم متصدرة..

لسة امبارح كنت مع واحد صاحبي زي السكرة .. وشربنا كوبايتين شاي مع حبة كركرة..

 المية ساعات متقطرة .. وكتير بتكون متعكرة .. زي الدنيا بالظبط .. فماتزعلش لما تلاقيها مكشرة .. وافرح قوي لما تكون متظبطة .. وعيشها وحبها من غير شحططة..

الي كل الناس المتأثرة .. كفاية كدة هفلطة .. يلا نعمل حاجة مكسرة .. وسيبنا بقي من الناس المتنكرة..

 معلش لو كان كلامي فيه حبة هرجلة .. بس ماجتش عليا في شوية فضفضة .. اشوفكم بقي في حتة منورة .. في ظروف مش متسربعة .. الحياة ملخبطة .. أحمد صلاح .. مهندس كهربة..

أحمد صلاح

11/7/2011