شوية حاجات وكدة

 ..شوية حاجات وكدة

شوية حاجات وكدة .. كلامنا المصري جميل ومليّان كلام لا أصل له ولا فصل .. كام كلمة جت كدة وبقيت هي اللغة واللغة جمبها قشطة عايشة ومافيش مشكلة .. ساعات أقولك يعني وأي حاجة ويَلَا ويا صاحبي وكدة .. و"كدة" بالذات الكلمة اللي بتعوض معظم كلامنا التايه في جيلي والجيل اللي قبله واللي بعده وكدة ..

باحب شوية حاجات واكره حاجات ومحتاجات تانية .. وأفرح شوية وأزعل شويتين تلاتة وكدة .. في حاجات بتبقي ايه، كدة .. وحاجات مش قد كدة .. حاجات بتبسطك قوي كدة .. وحاجات بتفضل عليك منكدة .. سيبك منها وخدها زي ماهي كدة .. وان تعبت، جربها كدة .. وماتعكرش دمك ما بين ده وده ..

محسوبكم مهندس كهربة .. يعني شاطر في الرياضة والحساب والحاجات اللي كده .. ومهندس كهربة مش كهربائي عربيات ولاسليسيون ولا الحاجات اللي من الشكل ده .. مهندس كهربة لا بافهم لا في الطور ولا في التيار ولا الفولت ولا الحاجات اللي المشحونة أو متفرغة كدة أو كدة .. صحيح بشمهندس آه، بس الستر حلو علي البشمهندس اللي كدة و كدة .. الشغل حلو مافيش كلام، وحلاوته في فلوسه وبس علي كدة .. والفرحة بتيجي بجد يامن بنوتة ضحكتها طالعة بعفوية كدة .. يا من حدوتة من ست الكل وهي رايقة قوي كدة ..

باحب الشعر وماعرفش أقوله .. وأعشق اللحن بس مش شاطر في عوده .. وأموت في الرسم بس أخري أشوفه أو أنوله .. باحب فيروز وبناتها من الشام .. وأسمع فوزي ومنير وكلثوم وساعات أي كلام .. وفي القراية ليّا حواديت ياما .. والكتاب ياخد من شهر لاتنين يادوب معايا .. باتعب من التحليل والسياسة والفلسفة والكلام اللي كله خبايا .. ودماغي آخرها رواية أو اتنين من أدب عم أمين وحاجات من الشعر لبخيت وحدّاد وتميم وكدة ..


أحب الشاي ابو لبن .. خصوصا لو معاه مزيكا وحبة شجن .. وياسلام لو حتة هريسة أو رز بلبن .. ساعات باروح اسكندرية بعود نعناع ويّا الشاي ابو لبن .. أو اسمع غنوة لمنير عن البحر والموج من غير تمن .. ليّا مع الشام حبة حاجات بس بيني وبينكم لا تقولوا لحد لا كدة ولا كدة .. منيحة لبنان وكرمالها رضيت بعجئة شارعنا كرمال حبة مصاري أروح أسمع بيها هيك وعن جد وتقبرني و كدة .. بس كل الكلام ده كان زمان وقبل كدة .. زمان قبل مايجي القدر ويضم ال"لام" ويطير ال"نون" بالشكل ده ..


باحب مصر متأخر قوي أو بدري وهي رايقة كدة .. الطريق أبو ساعتين يادوب آخره نصاية وتبقي في أبو الفدا .. وياسلام علي قهوة الصبح في الزمالك علي النيل في وشوش كلها رضا .. أو كيكة بالقرفة بعد خروجة صحاب ضحكها مفرقع نِدا .. مافيش أحلي من قاعدة صحاب علي قهوة من غير كلام لا في هم ولا فرهدة .. مافيش أحلي منها غير قاعدة تانية مع الغالية اللي كلها سلطنة .. حبيتها من قرف الناس واتقابلنا مرة أو مرتين من غير ابتدا .. دماغي ومافيش غيرها مسوحني بالشكل ده .. صباحكم رايق وحلمكم عليّا في كلمتين من غير ما اسمع "ايه القرف ده" .. وتفضل الدنيا شوية حاجات وحشة وحاجات تانية مبهجة .. ومن كل ده وده في كدة وفي كدة ..

 رسم صديقي الفنان: محمد حسن

أحمد صلاح
4/9/2013